٩ مانگ بەسەر کردنەوەی سەنتەری هەڵەبجەی شەهیددا تێدەپەڕێت
Mobile menu

٩ مانگ بەسەر کردنەوەی سەنتەری هەڵەبجەی شەهیددا تێدەپەڕێت

IMG 7151

٥٩٠٦ کەس لە چالاکییەکانی سەنتەرەکەدا بەشدار بوون

 

بەمەبەستی پێگەیاندن و پەروەردەکردنی لاوان و بردنە سەرەوەی هۆشیاری کۆمەڵایەتی و رەخساندنی کەشێکی پەروەردەیی بۆ ئاوارە و پەنابەران لە زۆربەی کەمپەکانی سنووری هەرێمی کوردستاندا سەنتەریی پەروەردەیی، رۆشنبیری و هونەریی هەیە  و چالاکی جۆراوجۆر تیایاندا بەرێوەدەچێت.

لە ٢٩یەمین ساڵیادی کیمیابارانکردنی هەڵەبجەدا دەزگای خێرخوازیی بارزانی و رێکخراوی نێودەوڵەتی ANCF سەنتەری رۆشنبیری و كۆمه‌ڵایه‌تی و فەرهەنگییان بۆ رێزگرتن لە یادی شەهیدانی هەڵەبجە بەناوی هەڵەبجەی شەهید بۆ کەمپەکانی دیبەگە کردەوە.

ئامانج لەکردنەوەی سەنتەرەکە راهێنان و پەروەردەکردنی فيکری ئاوارەکانە بەتایبەتی منداڵان و پێکهێنانی ژینگەیەکی پەرەوەردەییە لە ناو کەمپی ئاوارەکاندا.

رێکەوتی ١٦ی ئاداری ١٩٨٨ شاری هەڵەبجە لەلایه‌ن رێژمی بەعسەوە کیمیابارانکرا و ٥٠٠٠ هاوڵاتی بێتاوانی شارەکە شەهیدبوون، سەنتەرەکە بۆ رێزگرتن لە یادی شەهیدەکان و لە ٢٩یەمین ساڵیادی ئەو كاره‌ساته‌ دڵته‌زێنه‌دا،لەلایەن دەزگای خێرخوازیی بارزانی لە مەراسیمێکدا بە ئامادەبوونی موسا ئەحمەد سەرۆکی دەزگای خێرخوازیی بارزانی و نوێنەرانی ANCF و بەرپرسانی ئیدارەی شارەدێی دیبەگە کرایەوە.

لە سەنتەری هەڵەبجەی شەهیددا زۆر چالاکی رۆشنبیری و هونەری و پەروەردەیی و فێرکاری بەرێوەدەچێت کە دەتوانین ئاماژە بە مانە بکەین ''وەرزشی، کۆمپیوتەر، مۆسیقا خەیاتی، رێنمایی تەندرووستی و کۆمەڵایەتی، سمینار و وێنەکشان''.

لە رۆژی کردنەوەی سەنتەرەکەدا موسا ئەحمەد سەرۆکی دەزگای خێرخوازیی بارزانی سەبارەت بە گرنگی ئەم رۆژە و ئەو کارەساتەی کە بەسەر هاونیشتمانانی هەڵەبجەدا هات وتی: ''لەم رۆژەدا شەهیدانی هەڵەبجە لەیاد ناکەین و ئەوان هەمیشە لە یاد و زهنی ئێمەدا بە زیندووی دەمێننەوە'' سەبارەت بە گرنگی کردنەوەی سەنتەری هاوشێوە لە کەمپەکاندا وتی: ''ئاوارەکان توشی کارەساتی مرۆیی بوونەوەتەوە، رۆژگارێک ئێمە ئەنفال و کیمیاباران دەکراین، ئێستا خەڵکانێک بەهۆی دڕندەیی تیرۆریستانەوە هانایان بۆ ئێمە هێناوە، بوونی ئەو جۆر سەنتەرانە لە ناو کەمپی ئاوارەکاندا دەتوانێت ژینگەیەکی لەباری پەروەردەیی و فيکریان بۆ دروست بکات، هەوڵدەدین بتوانین لە رێی سەنتەرەکانەوە زیاتر لە کلتووری کوردیان نزیک بکەینەوە''.

لە ٩ مانگی دەستبەکار بوونی سەنتەرەکەدا لە رێکەوتی ١٦/٣/٢٠١٧وە هەتا ئێستا ٦٩ چالاکی جۆراوجۆری، لەلایەن دەزگای خێرخوازیی بارزانی و رێکخراوە ناوەچەیی و نێوەدەوڵەتییەکانەوە تیادا بەڕێوەچووە و ٥٩٠٦ کەس بەشداری چالاکییەکانی سەنتەرەکە بوون.

لە کۆی رێژەی بەشداربوواندا ١٧١١ منداڵ هەیە. لە سەنتەرەکاندا گرنگی تایبەت بە پەروەدەیی فکری و تواناییەکانی منداڵان دەدرێت. لە سەنتەرەکەدا چالاکی هونەری و وەرزشی بۆ منداڵان بەڕێوەچووە وەکوو ''مۆسیقا و وێنەکێشان و کێبڕکێی وەرزشی'' لەگەڵ ئەوەشدا خولی ئاهەنگی تایبەت بۆ دڵخۆشکردنی منداڵەکان بەڕێوەبراوە و دیاری دەزگای خێرخوازیی بارزانی پێشکەشی منداڵەکان کراوە.

لە کۆی چالاکییەکانی سەنتەرەکەدا ٢١٢٢ ژن لە خولی فێرکاری و رێنمایی پەروەردەیی منداڵ و مافی ئافرەتاندا و بۆنە و ئاهەنگەکانی سەنتەرەکە بەشداری چالاکییەکان بوون. هەروەها ١٧٧٦ پیاو لە چالاکییە جۆراوجۆرەکانی سەنتەرەکەدا بەشداربوون.

سنەتەری هەڵەبجەی شەهید لە دیبەگە  درووست کراوە کە تایبەتە بە هەر سێ کەمپی دیبەگە ١، دیبەگە ٢ و دیبەگە یاریگا، کەمپەکان دەکەونە شارەدێی دیبەگەی سەربە پارێزگای هەولێر و تایبەتن بە ئاوارەکانی موسڵ و دەورووبەری کە لەگەڵ هاتنی داعش بۆ ناوچەکانیان ئاوارەی هەرێمی کوردستان بوون.