Mobile menu

موسا ئەحمەد: لە چواردە رۆژدا ٣٦١٤٥ خێزان و ١٨٢٣٦ کەسی کەمدەرامەت هاوكاری کراون

راپۆرت

دەزگای خێرخوازیی بارزانی بەردەوام هاوکاری کەسانی کەمدەرامەت و هەژار دەکات و لەیەکەم رۆژی ئاوارەبوونی بە دەیان هەزار خەڵکی موسڵ و کوردانی رۆژئاوا و ئێزیدی لە چیای شەنگال دەزگای خێرخوازیی بارزانی بەهانایانەوە چووە هەتا بتوانن سەرلەنوێ ئومێدیان بۆ درێژەدان بە ژیانێکی نوێ لەلا زیندوو ببێتەوە.

به‌رده‌وامی هاوكارییه‌كان

لە ماوەی هەفتەی دووهەم و سێهەمی مانگی کانوونی یەکەمی ئەمساڵدا دەزگای خێرخوازیی بارزانی هاوکاریی جۆراوجۆری ٣٦١٤٥ خێزان و ١٨٢٣٦ کەسی کەمدەرامەت و ئاوارەی ناو و دەرەوەی کەمپەکانی کردووە. هاوکارییەکان زۆربەی چین و توێژەکانی کۆمەڵگای گرتووەتەوه‌، له‌و باره‌یه‌وه‌ موسا ئەحمەد جێگری سەرۆکی دەزگای خێرخوازیی بارزانی رایگەیاند: لە ماوەی دوو ساڵی رابردوودا (٢٢٤٨٧٩٩) کەس لە سێکتەرە جۆراوجۆرەکاندا هاوکاری و پێداویستییان بۆ دابین کراوە.

چالاکترین دەزگا لە هەرێمی کوردستان

دەزگای خێرخوازیی بارزانی وەکو باشترین و چالاکترین دەزگا لە هەرێمی کوردستاندا لە لایەن دەزگای روانگەوە دیاری کراوە، لە رێکەوتی ٨/١٢/٢٠١٦ دەزگای روانگە لە مەراسیمێکدا له‌شاری دهۆك خەڵاتی باشترینەکانی ساڵی دابەشکرد، کە لە نێو رێکخراوەکاندا دەزگای خێرخوازیی بارزانی وەکو چالاکترین و باشترین دەزگای خێرخوازیی و مرۆیی لە رووی بەهاناوەچوونی ''ئاوارە، پەنابەران، خەڵکی لێقەوماو، منداڵانی بێباوک و سێکتەرەکانی پەروەردە و تەندروستی'' دیاری کرا. سه‌باره‌ت به‌ هه‌ڵبژاردنیان وه‌ك باشترین ده‌زگای خێرخوازیی له‌ هه‌رێمی كوردستان، لەو بارەیەوە جێگری سەرۆکی دەزگای خێرخوازیی بارزانی رایگەیاند: هه‌موو ئه‌و خه‌ڵاتانه‌ی پێشكه‌ش به‌ ده‌زگای خێرخوازیی بارزانی ده‌كرێن، ته‌نها بۆ رێزگرتن نییه‌ له‌ كارو ماندوبوونی كادیره‌كانی ده‌زگا و چالاكیه‌ خێرخوازیی و مرۆییه‌ جۆراوجۆره‌كانی، به‌ڵكو رێزگرتنه‌ له‌ ته‌واوی خه‌ڵكی كوردستان، رێزگرتنه‌ له‌و كۆمپانیاو كه‌سایه‌تییه‌ خێرخوازانه‌ی كه‌ به‌رده‌وام پاڵپشت و هاریكاری ده‌زگاكه‌مان ده‌كه‌ن بۆ به‌ره‌وپێشچوون و ئه‌نجامدانی كاری گه‌وره‌تر له‌ناوخۆی كوردستان و بۆ ئاواره‌و په‌نابه‌رانیش به‌هه‌مانشێوه‌ درێغیان نه‌كردوه‌. موسا ئه‌حمه‌د جێگری سه‌رۆكی ده‌زگای خێرخوازیی بارزانی ئاماژه‌ی به‌وه‌شدا ''به‌گرنگی ده‌زانم زۆر سوپاسی ده‌زگای روانگه‌ بكه‌م كه‌ ساڵانه‌ به‌ بیرۆكه‌و داهێنانی نوێوه‌ كاری گرنگ و له‌پێشینه‌ له‌ كوردستان ئه‌نجامده‌دات و ئێمه‌ش سوپاسیان ده‌كه‌ین و ده‌ستخۆشیان لێده‌كه‌ین و هیوای به‌رده‌وامی له‌كاری زیاترو پڕ به‌هره‌تریان بۆ ده‌خوازین''.

پێداویستی ناوماڵ

دەزگای خێرخوازیی بارزانی پێداویستی ناوماڵ بۆ ئاوارەکان و کەسانی کەمدەرامەت دابین دەکات و بەردەوام هاوکارییەکانی لە بوارە جیاوازەکاندا بەپێی پێویستییەکانی خەڵکی کەمدەرامەت پێشکەشکردووە و لەماوەی چواردە رۆژی رابردوودا پێداویستی ناوماڵ بۆ ١١٩١٩ خێزان و ١١٠٠٩ کەسی ئاوارە دابینکراوە کە پێدوایستییەکان بریتین لە ''دۆشەک، بەتانی، سۆبە و پێدوایستی خاوێنکەرەوە و ...هتد''. موسا ئەحمەد سەبارەت بە دابینکردنی هاوکارییەکان بۆ پەنابەران و کەسانی کەمدەرامەت ئاماژەی بەوەکرد کە لە ماوەی دوو ساڵی رابردوودا دەزگای خێرخوازیی بارزانی زیاتر لە (٧١٤٣٦) پێداویستی جۆراوجۆری پێشکەشی ئەو کەسانەکردووە کە پێویستیان بە هاوکارییە کە بریتین لە ''(٦٤٣٥٠) خێوەت و کەلووپەلی پێداویستی ناومال، (١٦٠٠)سۆبە، (٤٧٧٢) بەتانی و دۆشەکە، ١١مۆلیدەی کارەبا، ٦٨٨ موبەریدە و ١٥ مەکینەی دوورمان''.

دابه‌شكردنی سوتەمەنی

دەزگای خێرخوازیی بارزانی بە هاوکاری و هەماهەنگی رێکخراو و ناوەندە جیهانییەکان و کەسانی خێرخواز بەردەوام هاوکاری پەنابەران و ئاوارەکان و کەسانی کەمدەرامەتی کردوە و لەگەڵ هاتنی وەرزی زستان پێویستی پەنابەر و ئاوارەکان بە سوتەمەنی و ئامێرەکانی گەرمکەرەوە زیاتر دەکات و دەزگاش لەو رووەوە هاوکارییەکانی خۆی پێشکەشیان کردووە کە لە ماوەی دوو هەفتەی رابردوودا نەوت و سوتەمەنی بەسەر ٧٩١٢ خێزاندا دابەشکراوە.

جێگای ئاماژەیە، دەزگای خێرخوازیی بارزانی بە هەماهەنگی لەگەڵ ناوەند و رێکخراوە جیهانی و ناوچەییەکان بەردەوام نەوت و گازی پێشکەشی ئاوارەکانی چیای شنگال، رۆژئاوای کوردستان و بەشەکانی دیکەی عێراق کە بەهۆی شەڕەوە ئاوارە بوون کردووە و لە ماوەی ئەم دوو ساڵەی رابردوودا (٨٣٠٣٤٠) لیتر نەوت بەسەر(٤١٩٦٧) خێزاندا دابەشکراوە.

بواری پەروەردە

دەزگای خێرخوازیی بارزانی گرنگی تایبەتی بە بواری پەروەردە داوە و پێداویستی خوێندنی بۆ ئەو قوتابیانە دابینکردووە کە پێویستیان بە هاوکارییە بۆ درێژەدان بە پرۆسەی خوێندن، لە ماوەی هەفتەی دووهەم و سێهەمی مانگی ١٢دا دەزگای خێرخوازی بارزانی پێداویستی خوێندنی بۆ ٢٤٨٠ قوتابی قوتابخانەکانی ''نەورۆزی کچان، فتوەی سەرەتایی، نورلسەباحی سەرەتایی، زێڕینی بنەڕەتی، گرێسپی کەمپی هەرشەم و کەمپەکانی دیبەگە'' دابینکرد. موسا ئەحمەد جێگری سەرۆکی دەزگای خێرخوازیی بارزانی رایگەیاند: دەزگای خێرخوازیی بارزانی بەگرنگیدان بە پرۆسەی خوێندن و پەروەردە هاوکارییەکانی روو لە قوتابیانە و پێداویستی خوێندن و جانتا بەسەر قوتابیاندا بڵاو دەکاتەوە و لە ماوەی دوو ساڵی رابردوودا ٧ قوتابخانەی ١٢ پۆلی کردووەتەوە و (٦٢٨٥٢) جانتا و پێداویستی خوێندنی پێشكه‌شی قوتابیانی هەرێمی کوردستان و سەرجەم کەمپەکان کردووە.

دابه‌شكردنی جلوبەرگ

دەزگای خێرخوازیی بارزانی بەهاوکاری ناوەند و رێکخراوە جیهانییەکان و کەسانی خێرخواز جلوبەرگی گەرم بۆ کەسانی کەمدەرامه‌ت و لێقەوماوان دابین دەکات، لە ماوەی هەفتەی رابردوودا ٧٤٠ خێزان و ٤٤٥٠ کەس سوود مەندبوون و جل و پێداویستییان وەرگرتووە. جێگری سەرۆکی دەزگای خێرخوازیی بارزانی لەو بارەیەوە رایگەیاند: لە وەرزی سەرمادا جلوبەرگ یەکێکە لە پێداویستییە سەرەکییەکانی ئاوارەکان و کەسانی کەمدەرامەت کە لە ماوەی ئەم هەفتەیەدا جلوبەرگ بۆ کەسانی کەم دەرامەت و کرێکارانی شارەوانی دابینکراوە هەروەها جلوبەرگی گەرم بەسەر ژمارەیەکی زۆر لە خێزانەکانی کەمپی خازر و ئاوارەکان لە ناوچەکانی دیکە دابەشکراوە.

هاوكارییه‌ خۆراكیه‌كان

دەزگای خێرخوازیی بارزانی رۆژانە جۆرەها خۆراک پێشکەشی پێشمەرگە، ئاوارەکان، پەنابەران كردووه کە لە ماوەی هەفتەی رابردوودا ١٤٤٩٧ خێزان هاوکاری خۆراکی کراون و زیاتر لە هەزاران ژەمە خۆراکی گەرم ئامادەکراوە. بۆ هه‌مان بابه‌ت، موسا ئەحمەد سەبارەت بە هاوکارییە خۆراکیەکانی دەزگا لە ماوەی دوو ساڵی رابردوودا رایگەیاند: لە ماوەی ئەم دووساڵەدا (٩٣٥٥٩٧) پارسێلی خۆراکی بەسەر خێزانە ئاوارەکان و کەسانی کەم دەرامەتدا دابەشکراوە کە هەر پارسێلێک به‌تێكڕا (٢٨) كیلۆگرامه‌، هەروەها مانگانە بە هاوکاری پرۆگرامی جیهانی خۆراک بەشەخۆراکی مانگانە بۆ ٢٣ هەزار خێزان دابین دەکرێت.
 لە درێژەی کاروچالاکییەکانی دەزگای خێرخوازیی بارزانی دا یادی لە دایک بوونی پێغەمبەری ئیسلام (د.خ) بەرزراگیرا و بەو بۆنەیەوە هاوکاری پێشکەشی ٢٧ خێزانی شەهیدی شارەدێی شیلادزێ
ی سەر بە قەزایی ئامێدی کرا. هەروەها بۆ هه‌مان بۆنه‌، ژماره‌یه‌ك گه‌ڕه‌كی ناو شاری هه‌ولێر و ده‌وروبه‌ری به‌سه‌ركرانه‌وه ‌و هاوكاریكران و ده‌زگای خێرخوازیی بارزانی پارسێلی خۆراك (خۆراكی وشك)ی به‌سه‌ر ١٠٥٠ خێزاندا دابه‌شكرد.موسا ئەحمەد لەو بارەیەوە رایگەیاند: به‌مه‌به‌ستی به‌رز راگرتنی مانگی مه‌ولود و له‌دایكبوونی پێغه‌مبه‌ری ئیسلام محه‌مه‌د (د.خ) ساڵانه‌ ده‌زگای خێرخوازیی بارزانی به‌ چالاكی جۆراوجۆری خێرخوازیی به‌شداری له‌و یاده‌ مه‌زنه‌دا ده‌كات و خه‌ڵكی هه‌ژارو كه‌مده‌رامه‌ت سودمه‌ند ده‌بن، بۆ ئه‌مساڵیش هه‌ڵمه‌ته‌كانی ده‌زگای خێرخوازیی بارزانی ده‌ستی پێكردوه‌ کە تیایدا خێزانی شەهیدان و کەسانی کەم دەرامەت سودمەند دەبن.