Mobile menu

گه‌وره‌ترین هاوكاری به‌سه‌ر منداڵانی بێ باوكدا دابه‌ش ده‌كرێت

azizan 20183

موسا ئەحمەد: دەوڵەتی ئیمارات بە بەردەوامی دانیان بەم پرۆژەیە ئەرکێکی قورسیان لەسەر شانی ئێمە هەڵگرتووە.

 

azizan 2018 دەزگای خێرخوازیی بارزانی بە سپۆنسەری دەوڵەتی ئیمارات لە مەراسیمێکدا قۆناغێکی دیکەی پرۆژەی چاودێری ئازیزانی راگەیاند. لەم قۆناغە نوێیەی پرۆژەی چاودێری ئازیزاندا موچەی ١٠٧١٤ ئازیز لە سەرتاسەری کوردستاندا دابەش دەکرێت.

 

رۆژی دووشه‌ممه‌ رێككه‌وتی 13/8/2018 كاتژمێر (2)ی پاش نیوه‌ڕۆ له‌ هۆڵی پێشه‌وا له‌شاری هه‌ولێر، ده‌زگای خێرخوازیی بارزانی له‌گه‌ڵ مانگی سووری ئیماراتی له‌ مه‌راسیمێكدا هاوكاری قۆناغی (2016-2017)‌ كه‌ بریتییه‌ له‌ (8،284،798$) دۆلاری ئه‌مه‌ریكی به‌سه‌ر (10.714) منداڵی بێباوك راگەیاند.

 

مەراسیمەکە بە چەند دەقەیەک بێ دەنگی بۆ گیانی پاکی شەهیدان و بە سرودی نیشتمانی ئەی رەقیب دەستی پێکرد و پاشان بەڕێز نەوزاد هادی پارێزگای هەولێر چەند وتەیەکی پێشکەش بە بەشداربووان کرد.

لە وتارەکەیدا هاتبوو: دەستخۆشی لە هیلال ئەحمەری ئیماراتی دەکەین کە سپۆنسەر و پاڵپشتی دەزگای خێرخوازیی بارزانی‌یە بۆ گەیاندنی ئەم هاوکارییانە بۆ منداڵانی بێباوک لە شارەکانی هەرێمی کوردستان کە هەم خەڵکی هەرێم و هەم ئاوارە و پەنابەرەکان سودمەند دەبن.

 

دواتر بەڕێز مامۆستا مەلا عەبدوڵا سەرۆکی یەکێتی زانایانی ئاینی کوردستان چەند وتەیەکی پێشکەش کرد و گوتی: خۆشحاڵین کە ئەمڕۆ بەشدارین لەگەڵ ئێوە بۆ چالاکییەکی ئێجگار گەورە کە ماوە ماوە دەزگای خێرخوازیی بارزانی وەکوو نەریتێکی خۆیان و بەشێک لە کارەکانی خۆیان کاری گەورە دەکەن چوونکە هەڵگری ناوێکی گەورەن کە ئەویش ناوی مەلا مستەفا بارزانییە.

 

پاشان ئینفۆگرافیکێک لەسەر پرۆژەی چاودێری ئازیزان بە سپۆنسەری دەوڵەتی ئیمارات پێشکەشی بەشداربووان کرا.

 

دوابەدوای ئەوە بەڕێز موسا ئەحمەد سەرۆکی دەزگای خێرخوازیی بارزانی لەسەر پرۆژەی چاودێری ئازیزان سوپاسی دەوڵەتی ئیمارات و مانگی سوری ئیماراتی کرد کە بەردەوام هاوکاری دەزگای خێرخوازیی بارزانی و خەڵکی هەژار و کەمدەرامەت بوونە و شانبەشانی ئەوان بەشداربوون لە خزمەتکردنی مرۆڤایەتی. سەرۆکی دەزگای خێرخوازیی بارزانی گوتی: بەناوی بەڕێز سەرۆک بارزانی و بەڕێز مەسرور بارزانی سەرۆکی بۆردی دامەزرێنەرانی دەزگای خێرخوازیی بارزانی و سەرجەم ئازیزان و کارمەندانی دەزگای خێرخوازیی بارزانی سوپاسی بێپایانی دەوڵەتی ئیمارات و مانگی سوری ئیمارات دەکەین، کە بە بەردەوامی دانیان بەو پرۆژەیە ئەرکێکی قورسیان لەسەر شانی ئێمە هەڵگرت.

 

 

لە کۆتایی مەراسیمەکەدا دەستکرا بە دابەشکردنی موچەی ئازیزان کە لەلایەن دەوڵەتی ئیماراتەوە دابین کراوە و لە رۆژانی داهاتووشدا بەردوام دەبێت.

شێوازی دابه‌شكردنه‌ به‌پێی شاره‌كان و ژماره‌ی سوودمه‌ندان كه‌ له‌ڕێگه‌ی ئۆفیسه‌كانی ده‌زگای خێرخوازیی بارزانییه‌وه‌ به‌ڕێوه‌ ده‌برێن به‌مشێوه‌یه‌ ده‌بێت:

شاری هه‌ولێر و ده‌وروبه‌ری (3200) منداڵی بێ باوك بڕی (2.341.671$) دۆلاری ئه‌مه‌ریكی وه‌رده‌گرن.

شاری سلێمانی و ده‌وروبه‌ری (2872) منداڵی بێ باوك بڕی (1،572،197$) دۆلاری ئه‌مه‌ریكی وه‌رده‌گرن.

شاری كه‌ركووك ـ ئیداره‌ی گه‌رمیان و ده‌وروبه‌ری (2631) منداڵی بێ باوك بڕی (2،070،909$) دۆلاری ئه‌مه‌ریكی وه‌رده‌گرن.

شاری دهۆك و ده‌وروبه‌ری (2011) منداڵی بێ باوك بڕی (2،300،021$) دۆلاری ئه‌مه‌ریكی وه‌رده‌گرن.