Mobile menu

١٤١٠ خێزانی شەهید هاوکاری دەکرێن

موسا ئەحمەد: گەورەترین شانازییە بۆ ئێمە کە خزمەتی کەسوکاری شەهیدان بکەین

 

بۆ رێزگرتن لە تێکۆشان و فیداکاری پێشمەرگە شەهیدەکانی سەنگەری بەرگری دژی داعش، دەزگای خێرخوازیی بارزانی بە سپۆنسەری سیروان بارزانی بڕی ١ ملیۆن دیناری بەبۆنەی جەژنی رەمەزانی پیرۆزەوە پێشکەشی هەریەک لە خێزانە شەهیدانی دژی داعش دەکات.

 

ئەمرۆ رێکەوتی ١٥/٦/٢٠١٧ مەراسیمێکی تایبەت بۆ راگەیاندنی هەڵمەتێکی نوێ دەزگای خێرخوازیی بارزانی بە سپۆنسەری سیروان بارزانی بەڕێوەچوو و ئێوارە خوانێک بۆ کەسوکاری شەهیدان سازکرا، لە مەراسیمەکەدا دەزگای خێرخوازیی بارزانی رایگەیاند ١٤١٠ خێزانی شەهیدی سەنگەری بەرگری دژی تیرۆریستانی داعش هاوکاری دەکرێ و هەر خێزانێک بڕی ١ ملیۆن دیناری پێشکەش دەکرێت.

 

مەراسیمەکە بەبەشداری کەسوکاری شەهیدانی سەربەرز و نوێنەری کەسایەتی و لایەنە سیاسییەکان  و کۆنسۆڵگەریەکان و رێکخراوەکانی UNHCR  و UNICEF بەسرودی نیشتمای ''ئەی رەقیب'' دەستی پێکرد.

 

پاشان بەمەبەستی ئاشنا کردنی پرۆژەی چاودێری ئازیزان فیچەرێک بۆ بەشداربووان پێشکەشکرا.

 

هەر لە مەراسیمەکەدا نەوزاد هادی پارێزگاری هەولێر کارەکانی دەزگای خێرخوازیی بارزانی بەرزنرخاند و وتی شەرەفێکی گەورەیە بۆ هەموومان کە لەگەڵ بنەماڵەی شەهیدانین و جێگای دەسخۆشیە بۆ ئەو کارە گەورانەی دەزگای خێرخوازیی بارزانی دەیکات و لە درێژەی وتەکانیدا سوپاسی دەزگای خێرخوازیی بارزانی و سیروان بارزانی کرد بۆ ئەم چالاکییە کە بۆ کەس و کاری شەهیدان بەڕێوەی دەبەن وتیشی: ئیرادەی خەڵک و بە قارەمانی پێشمەرگە ئەو هێزە مرۆڤ دۆستە توانرا تیرۆریستان  شکست پێ بهێنرێت و لەو پێناوەدا قوربانی زۆرمان داوە.

 

لە درێژەی مەراسیمەکەدا وتاری کەسوکاری شەهیدان لەلایەن خاتوون گۆڤەند محەمەد باوە کچی شەهید محەمەد باوە خوێندرایەوە، لە وتارەکەی بەڕێزیاندا هاتبوو:'' ئێمە وەکوو کەسوکاری شەهیدان خۆمان بە سەرفەراز دەزانین کە نزیکترین کەسمان لە پێناو دۆزی رەوای گەلەکەمان بە هەڵفڕینی رۆحی خۆشەوسیتی لەو پێناوەدا نرخی داوە،'' لە درێژدا وتیشی:'' بەناوی خانەوادەی شەهیدان سوپاسێکی بێپایانمان بۆ سیروان بارزانی هەیە و رۆڵی بەرچاوی دەزگای خێرخوازیی بارزانی بەرزدەنرخێنین کە ئێمەی بەردەوام لەبیر نەکردووە و لە بۆنە خۆش و ناخۆشەکاندا نموونەیەکی گەورەیان لە گیانی مرۆڤ دۆستی پێشکەش کردووە.

 

پاشان کەریم سنجاری وەزیری پێشمەرگە بە وەکالەت چەند وتەیەکی پێشکەش کرد، بەڕێزیان وتیان: پێشمەرگە پیرۆزترین ناوە و خوێن بەخشین گەورەترین شانازیە، شەهیدانی ئێمە ناوی خۆیان و پێشمەرگەیان کردە سیمبۆلی ئازادی و بەرخۆدان لە تەواوی جیهاندا، بۆیە سوپاسی دەزگای خێرخوازیی بارزانی و سیروان بارزانی دەکەین کە رۆڵەکانی ئەو قارەمانانەیان لە یاد نەکردووە.

جێگای ئاماژەیە مامۆستای ئاینی مەلا عەبدوڵا سەرۆکی یەکێتی زانایانی کوردستان لە مەراسیمەکەدا وتی: دەستخۆشی لە دەزگای خێرخوازیی بارزانی و سیروان بارزانی دەکەین کە لە شەوی قەدر پاڵپشتی کەسوکاری شەهیدانن.

 

موسا ئەحمەد سەرۆکی دەزگای خێرخوازیی بارزانی وتارێکی پێشکەشی ئامادەبووان کرد و وتی: ''گەورەترین شانازییە بۆ ئێمە کە خزمەتی ئێوە کەسوکاری شەهیدان بکەین'' هەروەها وتیشی:''پێویستە سوپاسی دەوڵەمەندانی کوردستان بکەین کە بەردەوام پاڵپشتمان بوونە لە خزمەتکردنی خەڵکی کوردستان و ئەو ئاوارە و پەنابەرانەی کە هانایان بۆ کوردستان هێناوە، سوپاسی کاک سیروان بارزانیش دەکەین کە لە رێگەی ئێمەوە هاوکاری کەسوکاری شەهیدان دەکات و ئەم کارەش وەکوو هەموو کارەکانی دیکەمان بەبێ جیاوازی هاوکارییەکانمان پێشکەشی هەموو خێزانەکانی شەهیدان دەکەین لە رێگەی ئەو لیستەی کە وەزارەتی پێشمەرگە بە ئێمەی داوە.''

سەرۆکی دەزگای خێرخوازیی بارزانی لە درێژەی وتارەکەیدا وتی: '' دەزگای خێرخوازیی بارزانی ئەمرۆ بە شانازییەوە ناوێکی دیارە لە جیهانی مرۆڤایەتیدا و لە زۆر بواردا پرس و راوێژی پێدەکرێت و مۆڵەتی فەرمی لە عێراق و ئەمریکا و کوردستان هەیە'' سەبارەت بە پرۆژەی چاودێری ئازیزان وتیشی: '' جوانترین نموونە لە کارەکانمان پرۆژەی چاودێری ئازیزانە کە هەتا ئێستا هاوکاری ١٧ هەزار منداڵی بێباوک دەکەین و شانازیش دەکەین کە توانیومانە لە ئاستی ناوی بارزانیی نەمردا بین''.

موسا ئەحمەد سەبارەت بە پرۆژەکانی داهاتووی دەزگای خێرخوازیی بارزانی رایگەیاند: ''لە داهاتوودا پرۆژەیەکمان دەبێت بۆ خزمەتکردنی بیرندارانی پێشمەرگە و بودجەیەکمان بۆ ئەو ئەرکە تەرخانکردووە و لێرەوە داوا لە دەوڵەمەندانی کوردستان و رێکخراو و وڵاتە خێرخوازەکان دەکەین کە هاوکارمان بن لەسەر خستنی ئەم پرۆژە گرنگەدا کە لە جەژنی قوربانی ئەمساڵدا دەستپێکی پرۆژەکە رادەگەیەنین، هیواداریشین ئەم پرۆژەیەشـمان وەکوو پرۆژەکانی تر خاڵێکی گەشبێت لە مێژووی خزمەت کردنمان بە مرۆڤایەتی.''

 

لە کۆتایی مەراسیمەکەدا لەلایەن تیمەکانی دەزگای خێرخوازیی بارزانی بڕی ١ ملیۆن دینار پێشکەشی هەر یەک لە ٣١١ خێزانی شەهید کرا کە ئامادەی مەراسیمەکە بوون و هەڵمەتی هاوکارییەکان بەردەوام دەبێت و پێش جەژنی رەمەزانی پیرۆز هەر ١٤١٠ خێزانی شەهید سودمەند دەبن لەم دیارەیە کەلەلایەن سیروان بارزانی بۆیان ئامادەکراوە.