Mobile menu

خێزانی ٤٤٤ شەهید لە دهۆک لە مەراسیمێکدا هاوکاری دەکرێن

رۆژی سێشەممە رێکەوتی ٢٠/٦/٢٠١٧ دەزگای خێرخوازیی بارزانی مەراسیمێکی شایستەی بۆ کەسوکاری شەهیدان لە شاری دهۆک بەڕێوەدەبات و لە مەراسیمەکەدا بۆ هەرخێزانێکی شەهیدان بڕی ١ ملیۆن دیناری عێراقی پێشکەش دەکرێت.

 

جێگای ئاماژەیە مەراسیمەکە بەبەشداری کەسوکاری شەهیدان و  بەرپرس و کەسایەتییە سیاسییەکان و نوێنەری رێکخراو و لایەنەکان و ئەندام پەرلەمانەکان بە سرودی نیشتمانی ئەی رەقیب دەستی پێکرد و دواتر پرۆمۆیەک لەسەر کاروچالاکییەکانی دەزگای خێڕخوازیی بارزانی پێشکەشی بەشداربووان کرا.

 

دکتۆر فەرهاد ئەمین ئەترۆشی پارێزگاری دهۆک لە مەراسیمەکەدا چەند پەیڤێکی پێشکەش کرد و وتی: ''ئەمرۆ جارێکی دیکە خۆشحاڵین کە بەشدارین لە رێورەسمێکی وەهادا بۆ رێزگرتین لە کەسوکاری شەهیدانی قارەمان، لە رێگەی دەزگای خێرخوازیی بارزانی و بەڕێز سیروان بارزانی ئێمە لێرە کۆبووینەتەوە هەتاکوو ئەوە دووبارە بکەینەوە کە کەسوکاری شەهیدانی کوردستان شایەنی هەموو پشتیوانیەک و شایەنی هەموو رێزگرتنێکن'' لە درێژەی وتەکانیدا وتیشی: ''بەناوی کاگێڕی پارێزگای دهۆکەوە دەستخۆشی لە دەزگای خێرخوازیی بارزانی و سوپاسی کاک سیروان بارزانی دەکەین کە ئەم دەسپێشخەرییەیان کردووە''.

 

مامۆستا رەجەب بەڕێوەبەری گشتی بەڕێوەبەرایەتی شەهید و ئەنفالکراوەکان لە پارێزگای دهۆکدا وتارێکی پێشکەش کرد لە وتارەکەیدا وتی: ''یەکێک لە مەزنترین سەرمایەی میلەتی ئێمە پێشمەرگەکانن و سەرمایەیەکی لەویش مەزنتر شەهیدبوون و گیان بەختکردنە لە پێناو نیشتماندا. هاوکارییەکانی ئەمرۆی دەزگای خێرخوازیی بارزانی نیشانەی رێزدانانە بۆ گیان بەختکردوویی شەهیدانی کوردستان''.

 

جێگای ئاماژەیە لەلایەن بەڕێوەبەرایەتی شەهیدان و ئەنفالکراوانی دهۆک لەوحێکی رێزلێنانی پێشکەشی دەزگای خێرخوازیی بارزانی کرا بەهۆی کارو ئەرکەکانیان بەرانبەر خێزانی سەربەرزی شەهیدان.

 

لە درێژەی مەراسیمەکەدا وتەی هێزی پێشمەرگەی قارەمان لەلایەن عەبدولخالق باپیری و وتاری یەکێتی زانایانی ئاینی ئیسلامی لقی دهۆکی لەلایەن مامۆستای ئاینی مەلا ئێحسان رێکانی خوێندرایەوە لە وتارەکانی بەڕێزاندا سوپاس و پێزانینی ئەو کارەی کە کە دەزگای خێرخوازیی بارزانی پێی هەستاوە کرا و هیوایان خواست کە بەردەوام خزمەت و هاوکاری کەسوکاری شەهیدان بکردرێت.

پاشان وتاری خێزانی سەربەرزی شەهیدان لەلایەن زێرەڤان شەهید عەبدوڵاوە خوێندرایەوە لە وتارەکەیاندا ئاماژەیان بەوەدا کە خزمەتکردنی کەسوکاری شەهیدان ئەرکێکی پیرۆزی نیشتمانی و ئاینییە و سوپاسی دەزگای خێرخوازیی بارزانی و سیروان بارزانی کرد بۆ کۆمەک و هاوکارییەکانیان.

رێڤینگ محەمەد هروری بەرپرسی ئۆفیسی دهۆکی دەزگای خێرخوازیی بارزانی بەخێرهاتنی میوانە بەڕێزەکانی کرد و جەختی لەوەکردەوە کە دەزگای خێرخوازیی بارزانی شانازی دەکات بە خزمەت کردنی کەسوکاری شەهیدان و ئەوان لەیاد ناکات.

 

جێگای سەرنجە لە کۆتایی مەراسیمەکەدا دیاری سیروان بارزانی کە پێکهاتبوو لە بڕی یەک ملیۆن دیناری عێراقی بۆ هەر خێزانێک پێشکەشی کەسوکاری شەهیدان کرا و کۆی گشتی خێزانی ٤٤٤ شەهید سودمەند بوون.