Mobile menu

یونیسێف: بەهۆی بۆردومانەکانەوە لە عەفرین ١١ منداڵ گیانیان لەدەست داوە

CHild 27.1.2017

بەپێی راپۆرتی رێکخراوی منداڵپارێزی سەربە نەتەوە یەکگرتووەکان ''یونیسێف'' لە ئەنجامی بۆردومانەکانەوە ١١ منداڵ لە شاری عەفرینی رۆژئاوای کوردستان گیانیان لەدەست داوە و بەهۆی مەترسی زیاتر لەسەر منداڵانی ئەو شارە هۆشداری بە لایەنە پەیوەندیدارەکان دەدرێت.

 

منداڵان قوربانی سەرەکی شەڕ و ئاڵۆزییەکانن و بەپێی راپۆرتەکان لە عەفرین بە دەیان منداڵ بەهۆی بۆردومانەکانی سوپای تورکیاوە بوونەتە قوربانی. فه‌ران ئیكیزا نوێنەری یونیسێف لە سوریا لە چەند راپۆرتێکدا جەختی لەسەر گیان لەدەستدانی ١١ منداڵ و برینداربوونی دەیانی دیکە لە شاری عەفرین کردووەتەوە.

 

یونیسێف لە بەیانامەیەکدا هۆشداری لە رەوشی منداڵان لە سوریا بە تایبەتی عەفرین دەدات و لە ئێستادا ناوچەی عەفرین لە دۆخێکی زۆر هەستیاری ئەمنی و مرۆیی لەقەڵەم دەدات، لە بەیانامەکەی یونیسێفدا هاتووە کە ئەگەری ئاوارەبوونی ژمارەیەکی زۆر خێزان بەهۆی بوردوومانەکانی تورکیاوە هەیە و دوو تیمی پزیشکی سەربە نەتەوە یەکگرتووەکان لە ئامادەباشیدان بۆ هاوکاری کردنی ئەو خێزانەنە لە ئەگەری ئاوارەبوونیان دا.

 

رەوشی خراپی کەشوهەوا و بەردەوامی شەڕ لە ناوچەکەدا تەنگ و چەڵەمەی بە خێزانەکان هەڵچنیوە و بەشێکی زۆریان بەهۆی بۆردومانەکانەوە ناچارن پەنا بۆ ژێر زەمینی خانووەکانیان ببەن و بەشەکەی دیکەشیان رووەو کەمپەکان ئاوارە دەبن. ئەمە لە کاتێکدایە دۆخی وڵاتی سوریا بەگشتی ناجێگیرە و ژیانی بۆ منداڵان لەو وڵاتەدا ئەستەم تر کردووە.

 

هەروەها یونیسف بڵاویشی کردەوە، ته‌نیا له‌ماوه‌ی هه‌فته‌ی رابردوودا، ٩ منداڵ له‌ هێرشه‌كانی سوپای سووریا بۆ سه‌ر ناوچه‌ی خان شێخۆن و سه‌راقبی سه‌ر به‌ پارێزگای ئیدلب گیانیان له‌ده‌ستداوه‌. له‌ گه‌ڕه‌كی باب تۆمای سه‌ر به‌ شاری كۆنی دیمه‌شقیش ٣ منداڵ له‌كاتی گه‌ڕانه‌وه‌یان له‌ قوتابخانه‌، له‌ هێرشه‌كاندا گیانیان له‌ده‌ستداوه‌.

 

رێكخراوه‌كه‌ داوای له‌ سه‌رجه‌م لایه‌نه‌كانی شه‌ڕ له‌ سووریا كردووه‌، پارێزگاری خه‌ڵكی سڤیل له‌به‌رچاو بگرن، به‌تایبه‌ت منداڵان، وێڕای داواكردنی كردنه‌وه‌ی ده‌روازه‌ی ئه‌منی بۆ ئه‌و خه‌ڵكه‌ی له‌ ناوچه‌كانی شه‌ڕ راده‌كه‌ن.

 

سەرچاوەی هەواڵ: باس نیوز