Mobile menu

له‌ ئه‌كادیمیای كوردی خوێندنه‌وه‌ بۆ كتێبی پرۆژه‌ی سفێر ده‌كرێت

a conf 11 1

ده‌زگای خێرخوازیی بارزانی پاش ئه‌وه‌ی بۆ یه‌كه‌مجار هه‌ستا به‌ وه‌رگێڕان و چاپكردنی كتێبی (پرۆژه‌ی سفێر) بۆ سه‌ر زمانی كوردی، كه‌ تایبه‌ته‌ به‌ به‌یاننامه‌ی مرۆیی و لایه‌نی هه‌ره‌كه‌می پێورەكانی به‌ده‌نگه‌وه‌چوونی مرۆییانه‌ له‌كاری رێكخراوه‌ییدا، ‌سیمینارێكی له‌باره‌ی گرنگی وه‌رگێڕانی كتێبی پرۆژه‌ی سفێر بۆ سه‌ر زمانی كوردی به‌ ئاماده‌بوونی كه‌سایه‌تی بواری رێكخراوه‌یی و مرۆیی بەڕیوەبرد.

 

ئەمڕۆ چوارشەممە رێکەوتی ١١/٧/٢٠١٨ دەزگای خێرخوازیی بارزانی بە ئامادەبوونی کۆمەڵێک کەسایەتی و مامۆستای زانکۆ لە ئەکادیمیای کوردی خوێندنەوەی بۆ کتێبی پرۆژەی سفێرکرد، کە لەلایەن ئەو دەزگایەوە وەرگێڕدراوەتە سەر زمانی کوردی و گرنگی ئەو پرۆژەیەی لە کۆمەڵگای کوردیدا گەنگەشەکرا.

 

لە دەستپێکی سمینارەکەدا بەڕێز موسا ئەحمەد سەرۆکی دەزگای خێرخوازیی بارزانی چەند وتەیەکی پێشکەش کرد و گوتی: ''خۆشحاڵین کە بە پرۆژەیەکی جیاوازتر لە کارەکانی دیکەمان لە خزمەت ئێوەداین و شانازی دەکەین کە کلتوری بەخشندەی نەتەوەی کوردمان بە رێکخراوەیی کردووە و لە ئاستی جیهاندا شانازی بە مرۆڤ دۆستیمانەوە دەکرێت'' هەروەها بەڕێزیان لە درێژەی وتەکانیدا گوتی:'' سوپاسی هەموو ئەو بەڕێزانە دەکەین کە بەم پرۆژەیەوە ماندووبوون و تیایدا زەحمەتیان کێشاوە، هیوادارین لە داهاتوودا کاری هاوشێوە پێکەوە بکەینەوە''.

 

دواتر بەڕێز ئیبراهیم سەمین ئەندامی دەستەی کارگێڕی دەزگای خێرخوازیی بارزانی لەسەر کتێبی پرۆژەی سفێر چەند وتەیەکی پێشکەش بە ئامادەبووان کرد و گوتی: ''لە کارێکی ناوازەدا دەزگای خێرخوازیی بارزانی کتێبێکی هەرە دانسقەی وەرگێراوەتەوە سەر زمانی کوردی و ئەم کتێبە وەکوو دەستووری کاری مرۆی لە ئاستی جیهانیدا ناسراوە''.

 

پاشان بەرپرسی فەرمانگەی رێکخراوە ناحکوومیەکان دەستخۆشی لە دەزگای خێرخوازیی بارزانی کرد کە پێشەنگ بووە لە وەرگێڕانی ئەم کتێبە گرنگە و گوتی: ''ئەم پەرتووکە زەنگین ترین پەرتووکە لە بواری کاری مرۆیدا و دەستخۆشی لە دەزگای خێرخوازیی بارزانی دەکەین کە پێشەنگ بووە لە وەرگێڕإانی ئەم کتێبە و دەستخۆشیشی لێدەکەین کە زۆر بە دڵسۆزی کارێکی جوانی لە خزمەتکردنی ئاوارە و پەنابەر و لێقەوماواندا کردووە''.

 

لە کۆتایی سمینارەکەدا لەوحی رێزلێنانی دەزگای خێڕخوازیی بارزانی لەلایەن بەڕێز موسا ئەحمەدەوە پێشکەش بە هەریەک لە بەڕێزان ''شەفیق حاجی خدر و ئاسۆ کەریم'' کرا کە لە کاری وەرگێران و پێداچوونەوەی کتێبەکەدا رۆڵییان هەبووە.