دەزگای خێرخوازی بارزانی بەشداری لە كۆنگرەی گەراندنەوەی ئارامی دەكات
Mobile menu

دەزگای خێرخوازی بارزانی بەشداری لە كۆنگرەی گەراندنەوەی ئارامی دەكات

farhafd 2

دەزگای خێرخوازیی بارزانی لە یەكەمین كۆنگرەی رێكخراوە ناحكومیەكان بە شداری کرد کە کۆنگرەکە لە ژێر ناونیشانی (رۆلی رێكخراوەكانی كۆمەڵگای مەدەنی لە گەراندنەوەی ئارامی) لە شاری هەولێر ئەنجامدرا.

 

farhafd 1 رۆژی دووشەممە رێکەوتی 30/7/2018 لە شاری هەولێر یەکەمین كۆنگرەی (رۆلی رێكخراوەكانی كۆمەڵگای مەدەنی لە گەراندنەوەی ئارامی) بەبەشداری چەندین رێكخراوی ناحكومی و نوێنەر فەرمانگەی رێكخراوە ناحكومیەكان لەلایەن دەزگای خەنجەر بۆ پەرەپێدان بەڕێوەچوو.

 

دەزگای خێرخوازی بارزانی بەشداری ئەم كۆنگرەیەی كرد، و لە لایەن بەرێز ویس جلیل چەند وتەیەك لەژێر ناونیشانی (رێگا چارە گونجاوەكان بۆ پاڵپشتیكردنی ئارامی گەڕاوەكان) پێشكەش كرا، و بەڕێزیان بابەتەكەی بۆ ئامادەبووان روون كردەوە. لە سەرەتای بابەتەكەی بەڕێزیاندا باسی شاری موسڵ كرا کە لە رابردوو و لە ئێستادا چۆن گۆرانكاری تێدا كراوە و رۆلی لە شارستانیەتی مرۆڤایەتی لەو بارەیەوە خرایەروو، پاشان باسی ئەو وێرانكاریانە كرا كە لە لایەن رێكخراوە تیرۆریستیەكانەوە بەرامبەر ئەو شارە كراوە، و چۆن سێكتەرەكانی پەروەردە و تەندروستی و پاك و خاوێنی سیمای ئەو شارە وێران كراوە، بێجگە لە روخانی زۆربەی قوتابخانە و بنكەی تەندروستی و پردەكانی ناو شار و چەندین شوێنی تر كە بە سێمبولی ئەم شارە دادەندران.

 

هەروەها لە باسەکەی بەڕێزیاندا ئاوڕ لەو ئاوارانە درایەوە كە كەمپەكانیان بەجێ هێشتوە وگەراونەتەوە شاری موسل و لە هەمان كاتدا بەهۆی نەبوونی خزمەتگوزاری و سادەترین مافەكانی ژیان، نەیانتوانیوە لەو شارەدا ژیان بەسەر ببەن.  بەم پێیەش ژمارەی ئەوانەی كە كەمپەكانیان بەجێ هێشتوە بریتیبووە لە 3,112 خێزان كە دەكاتە 15,395 كەس، هەر لە هەمان كاتدا ژمارەی ئەوانە كە گەراونەتەوە بۆ ناو كەمپەكان بریتیبووە لە 2,138 خێزان كە دەكاتە 10,209 كەس، ئەمەش رێژەیەكی زۆرە بەرامبەر بەو خواستەی كە چاوەروان دەكرا بۆ گەرانەوەی ئاوارەكان بۆ ناو شاری موسل. لە لایەكی تریشەوە باس لەو یارمەتیانە كرا كە دەزگای خێرخوازی بارزانی پێشكەشی ئاوارە گەراوەكان و دانیشتوانی شاری موسل كردووە. دوا بەدوای پێشكەش كردنی وتارەكە تاوتوێی هەندێك بۆچوون كرا و ئامادەبووان پرسیاریان ئاراستە كرد.

 

جێی ئاماژەیە رێكخراوەكانی تر وەكوو: رێكخراوی قەندیل، رێكخراوی گەشەپێدانی شارستانی ، دەزگای روانگە، رێكخراوی (UNFPA) وETTC و NDI و رێكخراوی ئافرەتانی كەمینەكان) ...تایبەت بە بوارە جیاوازەكان وەكوو رۆلی ئافرەتان و گەنجان و پەرەپێدانی مرۆیی وتاریان پێشەكەش كرد و لە كۆتاییدا چەندین راسپاردە ئاراستەی لایەنە بەرپرسیارەكان كرا، بۆ ئەوەی سوود بگەیەنێت بە گەراوەكان و ئاوارەكان.