Mobile menu

هه‌ولێر... خانەی بەساڵاچوان و پەککەوتوانی نوور نۆژەن کرایەوە

لە مەراسیمێکدا بە بەشداری کۆنسولگەری کوێت و ئەندامی دەستەی کارگێڕی دەزگای خێرخوازیی بارزانی تاکە خانەی پەککەوتوان لە هەرێمی کوردستاندا دوای نۆژەنکردنەوە، دووبارە کرایەوە.

رێکەوتی ٢٥/١/٢٠١٧ نۆژەنکردنەوەی خانەی بەساڵاچوان و پەکەوتووانی نوور لە شاری هەولێر کۆتایی پێهات و بۆ ئەو مەبەستە بە بەشداری (د. عمر الکندری کونسوڵگەری کوێت له‌ هه‌رێمی كوردستان، نەرمین خان نوێنەری حکومەتی هەرێم و ئیسماعیل عەبدولعەزیز ئەندامی دەستەی کارگێڕی دەزگای خێرخوازیی بارزانی) مەراسیمێک به‌ڕێوه‌چوو.

خانەی نوور تاکە خانەیە لە هەرێمی کوردستان کە تیایدا خزمەت بە پەککەوتووان دەکرێت و ٢٤ کاتژمێر کارمەندەکانی ئێشکگرن بۆ هاوکاری یارمەتییدانی کەسانی خاوەن پێداویستی تایبەت، و کارمەندەکانیان لەلایەن دەزگای خێرخوازیی بارزانیەوە پشتیوانی ماددی دەکرێن.

بەرێز ئیسماعیل عبدالعزیز  ئەندامی دەستەی کارگێری دەزگای خێرخوازیی بارزانی لە کۆنگرەیەکی رۆژنامەوانیدا وتی: ئەم بینایە لە ساڵی ٢٠٠٩ەوە لەلایەن دەزگای خێرخوازیی بارزانییەوە تەرخانکراوە و به‌پێی گرێبه‌ستێك دراوه‌ته‌ وه‌زاره‌تی كارو كاروباری كۆمه‌ڵایه‌تی حكومه‌تی هه‌رێم و مانگانه‌ هاوكاری مادیی ئه‌م خانه‌یه‌ ده‌كه‌ین، هه‌روه‌ها گوتی: خانەی نوور و لەماوەی ئەم چەند ساڵەدا زۆر خێرخواز و رێکخراو هاوکاری خۆیان پێشکەشی ئەم خانەیە کردووە کە جێگای خۆیەتی سپاسیان بکەین. له‌باره‌ی چۆنێتی دووباره‌ نۆژه‌نكردنه‌وه‌ی بیناكه‌، ئیسماعیل عه‌بدولعه‌زیز ئاماژه‌ی به‌وه‌دا: پرۆسه‌ی دووباره‌ نۆژه‌نكردنه‌وه‌ی خانه‌ی نور بریتی بوه‌ له‌ دووباره‌ ره‌نگڕێژكردنه‌وه‌ی ته‌واوی بیناو ژووره‌كان له‌گه‌ڵ فه‌رش رێژكردن و دروستكردنی 2 كۆگا و گه‌راجی ئۆتۆمبێل و هاوكات چاككردنه‌وه‌ی كاره‌بایی و بۆڕی ئاو و سه‌قف سانه‌وی سه‌رجه‌م باڵه‌خانه‌كه‌.

هەروەها به‌رپرسی به‌شی هاوكارییه‌كانی ده‌زگای خێرخوازیی بارزانی لە درێژەی قسەکانیاندا ئاماژەیان بە هاوکارییە مانگانەکانی دەزگای خێرخوازیی بارزانیدا، وتیشیان کە دەزگای خێرخوازیی بارزانی مانگانە بڕە بووجەیەک بۆ خانەی بەساڵاچووان و پەککەوتوانی نوور دابین دەکات.

جێگای ئاماژەیە خانەی بەساڵاچوانی و پەککەوتووانی نوور بەردەوام رێژەی ٧٠ هەتا ٧٥ بەساڵاچوو و پەککەوتەی تێدایە کە ٢٠ بۆ ٢٥ کەسیان ژنن، لە بەشی پەککەوتوانی خانەکەدا چاودێری ٣٣ پەککەوتە و خاوەن پێداویستی تایبەت دەکرێت و دەزگای خێرخوازیی بارزانی کارمەندی بۆ ئەو بەشە دابین کردووە.

دەوڵەتی کوێت لە درێژەی چالاکییەکانیدا بەهاوبەشی لەگەڵ دەزگای خێرخوازیی بارزانی ئەو خانەیەی نۆژەن کردەوە کە پرۆژەی نۆژەنکردەوەکە بۆ ماوەی ٤٠ رۆژ بەردوام بوو و ئەمە دووەمین جارە کە خانەی نوور نۆژەن دەکرێتەوە.

بەرێز د. عمر الکندری کونسولگەری کوێت لە هەولێر بە میدیاکانی راگەیاند کە دەوڵەتی کوێت لە سێکتەرەکانی پەروەردە و تەندرووستی و دابینکردنی خواردن بۆ ئاوارەکان و خەڵکی خۆجێی کوردستان پرۆژی هاوبەشی لەگەڵ دەزگای خێرخوازیی بارزانیدا بەڕێوەبردووە و لە داهاتووشدا لە پرۆژەکانیان بەردەوام دەبن، بەرێزیان وتیان لە ماوەی داهاتوودا ٥ قوتابخانە و ٣ بنکەی تەندرووستی لە ناو کەمپەکانی ئاوارەکاندا دەکەنەوە.