دەزگای خێرخوازیی بارزانی راپۆرتی کاروچالاکییه‌كانی ساڵی ٢٠١٦ی بڵاو کردەوە

 

هاوکارییەکانی دەزگای خێرخوازیی بارزانی بۆ ئاوارەکان زیاتر لە ٢٤ ملیارد دیناری عێراقی تێچوه‌

لە سێکتەری خۆراک له‌ ٩٩٨ چالاكیدا  ٢ ملیۆن و ٩٠٠ هەزار کەسی ئاوارە و پەنابەر سودمەند بوون

 

کۆنگرەیەکی رۆژنامەوانی بۆ بەڕێز موسا ئەحمەد پێکهات و لە کۆنگرەکەدا ڕاپۆرتی کاروچالاکی ساڵێکی دەزگای خێرخوازیی بارزانی بۆ ڕاگەیاندنەکان ئاشکرا کرا و پلان و كاركردنی بۆ ساڵی نوێی 2017 و ئه‌و پێشهات و ئاماده‌كارییانه‌ی بۆ پێشوازیكردن له‌ ئاواره‌كان و خزمه‌تكردنی خه‌ڵكی ناوخۆی هه‌رێمی كوردستان خرایه‌ڕوو.

ئەمڕۆ رێکەوتی ٣٠/١/٢٠١٧ راپۆرتی کاروچالاکییەکانی ساڵێکی دەزگای خێرخوازیی بارزانی لە کۆنگرەیەکی ڕۆژنامەوانیدا لە لایەن بەرێز موسا ئەحمەدەوە خرایە ڕوو.

بەرێز موسا ئەحمەد جێگری سەرۆکی دەزگای خێرخوازیی بارزانی لە کۆنگرە رۆژنامەوانییەکەدا بۆ راگەیاندنەکان دوا و وتی: لەماوەی ساڵی ڕابردوودا ١٦٧٣١١٨ ئاوارە و ٢٤١٣٩٥ په‌نابه‌ر روویان لە سنووری هەرێمی کوردستان کردووە. ئاشکرايکرد کە لە ماوەی ساڵی رابردوودا دەزگای خێرخوازیی بارزانی زیاتر لە ٤٠٠٠ چالاکی جۆراوجۆری لە سێکتەرەکانی (پەروەردەو رۆشنبیری، خۆراک، ناخۆراک و پەناگە و پاککەرەوە و پرۆژه‌ی چاودێریی ئازیزان و پرۆژه‌ی ویلچێر و هه‌لیكار) بەڕێوەبردووە و هاوکارییەکانی دەزگای خێرخوازیی بارزانی بۆ ئاوارەکان زیاتر لە ٢٤ ملیارد دیناری عێراقی تێچووە.

بەڕێزیان لە درێژەی وتەکەیاندا ئاماژەیان بەوەدا زۆربەی چالاکییەکانی دەزگای خێرخوازیی بارزانی لە ناو کەمپی ئاوارە و پەنابەراندا بەڕێوەچوون.

جێگای ئاماژەیە لە ماوەی سالی ٢٠١٦دا لە سێکتەری پەروەردە و رۆشنبیری ٧٢١ چالاکی بۆ ٣٣٨ هەزار كه‌س بەڕێوەچووە و لە چالاکییەکاندا پێداویستی خوێندن وه‌كو جانتا و پێداویستی خوێندن و خولی راهێنان و فێربونی كۆمپیوته‌رو زمان و هونه‌ری له‌سه‌نته‌ری ناو كه‌مپه‌كاندا سودمه‌ندبون، هەروەها لە سێکتەری خۆراکیدا ٩٩٨ هەڵمەتی هاوکاری ئاوارە و پەنابەران بەڕێوەچووە و لە هەڵمەتەکاندا ٢ ملیۆن و ٩٠٠ هەزار کەس سودمەند بوون.

لەهەرکام لە سێکتەرەکانی ناخۆراکی و پەناگە و پاککەرەوە ١٢٧٦ چالاکی جیاواز بۆ ئاوارەکان بەڕێوەبراوە و ژمارەی سودمەند بووان لەو سێکتەرانەدا دەکاتە ١ ملیۆن و ٦٩٦ هەزار ئاوارە و پەنابەر.

موسا ئەحمەد جێگری سه‌رۆكی ده‌زگای خێرخوازیی بارزانی سەبارە بە پرۆژەکانی دەزگای خێرخوازیی بارزانی لە ماوەی ساڵی رابردوودا ئاماژەی بە پرۆژەکانی (ویلچەر، چاودێری ئازیزان و هەلی کار) دا و بۆ راگەیاندنەکانی وت: پرۆژەی چاودێريی ئازیزان بۆ هاوکاریکردنی منداڵانی بێباوکە و  ١٠ هەزار و ٧٠٠ منداڵ سوودمەند بوون، هەروەها پرۆژەی ویلچەر تایبەتە بە خاوەن پێداویستییە تایبەتییەکان لە کەمپ و دەرەوەی کەمپی ئاوارە و پەنابەر و خەڵکی ناوخۆی کوردستان، لەو پرۆژەیەدا ٢٥ چالاکی بەڕیوەبراوە و ٧٠١ خاوەن پێداویستی تایبەت سودمەند بوون، لە درێژەی وتەکانی بەڕێز موسا ئەحمەد دا هاتبوو کە لەماوەی ساڵێکی رابردوودا دەزگای خێرخوازیی بارزانی هەلی کاری بۆ زیاتر لە ٦ هەزار کەس دابینکردووە.

جێگری سەرۆکی دەزگای خێرخوازیی بارزانی ئاماژەی بە پلانی کاروچالاکییەکانی دەزگای خێرخوازیی بارزانی کرد بۆ ساڵی داهاتوو و رایگەیاند لە پلانیاندایە کە هاوکارییەکانیان بگوازنەوە بۆ نێو سەنتەری شاری موسڵ و رێگری بکەن لە ئاوارەبوونی ژمارەیەکی زیاتری خەڵک، بەڕێزیان وتیشیان ئەگەر هەلی دووبارە ژیانەوە بۆ خەڵکی شاری موسڵ فەراهەم بکردرێت ئەوا کەس ناچار نابێت ماڵی خۆی بەجێبهێڵێت و روو لە سنوورەکانی هەرێمی کوردستان بکات، بارگارنییەکیش لەسەر شانی هەرێمی کوردستان کەم دەبێتەوە. هەروەها ئاماژەیان بە ژمارەی زۆری پەنابەران و ئاوارەکان لە سنووری هەرێمی کوردستاندا کرد و وتیشیان بە تێکڕایی ١٥ کەمپی یاسایی لە هەرێمی کوردستاندا بوونی هەیە و بەشێکی کەمپەکان لەلایەن دەزگای خێرخوازیی بارزانییەوە لەژێر چاودێری UNHCRـەوە بەرێوەدەچن.

جێگای باسە جێگری سەرۆکی دەزگای خێرخوازیی بارزانی پلانی دەوڵەتی عێراقی بۆ هاوکاری ئاوارە و پەنابەران وەکو پێویست نەزانی و وتیشی دەوڵەتی عێراق بە هیچ شێوەیەک هاوکاری پەنابەرانی رۆژئاوای کوردستانی نەکردووە هەروەها زۆر بە پەرت و بڵاوی هاوکاری گەیاندووەتە ئاوارە عێراقییەکان و هاوکارییەکانی وەکو پێویست نەبوون.