چالاکترین کەسایەتییەکانی رۆژهەڵاتی ناوەڕاست لە بوارە جیاوازەکاندا خەڵاتی رێزلێنانیان وەرگرت

بەرپرسی بەشی ئۆپەرەیشنی دەزگای خێرخوازیی بارزانی لە ئاستی خزمەتی کۆمەڵ خەڵات کرا

 

''رێزلێنانی رێبەرانی رۆژهەڵاتی ناوەڕاست'' ناونیشانی مەراسیمێکە کە ساڵانە لەلایەن فیدراسیۆنی جیهانی رێبەرانەوە بەڕێوەدەچێت و ئەمساڵیش لە وڵاتی دوبەی زیاتر لە ١٠٠ کەسایەتی و خاوەن کۆمپانیا و بەڕێوەبەری دەزگای مرۆیی وەکوو سەرکەوتووترین رێبەرەکانی رۆژهەڵاتی ناوەڕاست دیاری کران.

 

رێکەوتی ٢٣ی فێبریوەری ٢٠١٧ تارا بەهائەدین بەرپرسی ئۆپەرەیشنی دەزگای خێرخوازیی بارزانی بەهۆی پێشکەشکردنی کارنامەی کاری خۆی لە ماوەی ٢٣ ساڵی ژیانیدا لە بوارەکانی ئینسانی و پەروەردەییدا توانی خەڵاتی یەک لە باشترین رێبەرەکانی رۆژهەڵاتی ناوەراست لە خزمەتی کۆمەڵ وەربگرێت.

 

مەراسیمی رێزلێنانی رێبەرانی رۆژهەڵاتی ناوەڕاست بۆ یەکەم جار لە ساڵی ٢٠١٦ لە وڵاتی هیندستان لەلایەن فیدراسۆنی جیهانی رابەرایەتییەوە بەڕێوەچووە کە تیایدا لە ٧٥ بواری جیاواز کەسایەتییە سەرکەوتووەکان خەڵات کرابوون.

 

مەبەست لە بەڕێوەچوونی ئەو مەراسمە دیاریکردنی چالاکترین و سەرکەوتووترین کەسایەتییەکان و چیرۆکی رێبەرایەتییەکانیانە لە ماوەی ژیانی خۆیاندا، هەروەها لە رێگەی ناساندنی ئەو کەسایەتییە سەرکەوتووانەوە بتوانن ببنە هاندەر و رێگە خۆشکەر بۆ کەسانی دیکەش کە سەرکەوتنی هاوشێوە بەدەست بهێنن.

 

تارا بەهائەدین کە ئێستا بەرپرسی بەشی ئۆپەرەیشنی دەزگای خێرخوازیی بارزانییە توانی لە ئاستی تاکەکەسی لە مەراسمەکەدا بە ناونیشانی خزمەتی کۆمەڵگا خەڵات وەبگرێت، لە وتارێکدا کاری ئێستای دەزگای خێرخوازیی بارزانییان بۆ بەشداربووان شیکردەوە.

 

لەو مەراسیمەدا ١٠٠ کەسایەتی سەرکەوتووی دیکە خەڵاتی تایبەتییان وەگرت لەناویاندا هەرکام لە (بەڕێوبەری کۆمپانیا، نووسەر، بەڕێوەبەری رێکخراوی مرۆیی، منداڵترین داهێنەر و هتد) بەدی دەکران.

 

فیفیک بێدرا بەڕێوەبەری دەزگای نێودەوڵەتی فیفیک بێدرا، راشد ئەلیەمیم لە گەشەپێدانی مرۆیی، سانیس دوسیلڤا بەڕیوەبەری گشتی کۆمپانیای کاربۆن کۆنستلینگ و سەلەمان موراد میرزا نوسەری کتێبی the peak business club – Egypt بەشێک لەو کەسایەتی و نووسەرانە بوون کە خەڵاتی ساڵییان لە مەراسمی رێزلێنانی رێبەرانی رۆژهەڵاتی ناوەڕاست وەرگرت.

 

تارا بەهائەدین چەندین کاری پەروەردەیی و ئینسانی لە کارنامەی ژیانیدا هەیە، بەڕێزیان بۆماوەی پێنج ساڵ بەمەبستی جێخستنی پرۆسەی فیدرالی لە عێراق لەگەڵ وەکالەی ئەمریکی گەشەپێدانی نێودەوڵەتی کاری کردووە هەروەها لە ئەنجوومەنی بەریتانی British Council بە هاوکاری لەگەڵ رێکخراوەکانی unicef و یەکێتی ئەوروپا پرۆژەی بەرەوپێشبردنی پرۆسەی خوێندنیان لە عێراقدا بەڕێوەبردووە و لە ماوەی ژیانی خۆیدا زۆرترین شوێنە مەترسیدارەکانی عێرقی وەکوو (بەسرە، بەغدا، عەمارە و سەماوە کەربەلا و بابل ..هتد) بەسەرکردووەتەوە بە مەبەستی پێدانی رێنمایی پێویست بە خەڵک و پێگەیاندنی ئاستی هۆشیاری تاکەکان.