Mobile menu

قوتابیانی بەشەناوخۆییەکانی کوڕان و کچانی زانکۆی گەرمیان هاوکاری دەکرێن

Garmian 1.3.2018

هاوکارییەکانی دەزگای خێرخوازیی بارزانی بۆ قوتابیان درێژەی هەیە لەو چوارچێوەیەدا تیمەکانی دەزگای خێرخوازیی بارزانی لە کەلار هاوکاریی خۆراکی و تەندرووستیان گەیاندە قوتابیانی ٥٠٠ ژووری بەشەناوخۆییەکانی کوڕان و کچانی زانکۆی گەرمیان.

 

رێکەوتی ٢٨/٢/٢٠١٨ دەزگای خێرخوازیی بارزانی بەمەبەستی هاوکاری کردنی قوتابیانی بەشەناوخۆییەکان لە هەرێمی کوردستاندا پێداویستی خاوێنکەرەوە و خۆراکی گەیاندە قوتابییانی بەشەناوخۆییەکانی زانکۆی گەرمییان لە کەلار. لەم چالاکییەی تیمەکانی دەزگای خێرخوازیی بارزانی قوتابییانی ٥٠٠ ژووری بەشەناوخۆییەکان سودمەند بوون.

 

جێگای ئاماژەیە رێکەوتی ٢٥/٢/٢٠١٨سەرۆکی دەزگای خێرخوازیی بارزانی لە کۆنگرەیەکی رۆژنامەوانیدا لە پارێزگای هەولێر پرۆژەی هاوکاری کردنی ٤٦٩٧٦ قوتابی بەشەناوخۆییەکانی کوردستانی راگەیاند، دوابەدوای ئەوەش لە پارێزگاکانی هەولێر و سلێمانی و دهۆک و ئیدارەی گەرمیان هەڵمەتەکە دەستی پێکرد، کە بە تێکڕا قوتابییانی ١٤ زانکۆ لە هەرێمی کوردستان سودمەند دەبن.

 

دەزگای خێرخوازیی بارزانی ساڵانە لە یادی نەمراندا (بارزانی نەمر و کاک ئیدریسی جوانەمەرگ) هەڵمەتی بەرفروانی هاوکاری کردنی خەڵکی کەمدەرامەتی کوردستان بەڕێوەدەبات و ئەمساڵیش لە هەڵمەتێکی سەرتاسەریدا هاوکاری ٤٦٩٧٦ قوتابی بەشەناوخۆییەکانی سەرتاسەری کوردستان دەکات.