بنەماکانی کاری دەزگای خێرخوازیی بارزانی

 

دەزگای خێرخوازی بارزانی وەکو هەر دەزگایەکی مرۆیی پاپەندە بە بنەما سەرەکیەکانی کاری مرۆیی  کە لە یاسای نێودەوڵەتی کاری مرۆییدا جێگیرکراون ئەوانیش بریتین لە:

 

مرۆڤایەتی

بناغەی کاری مرۆیی و خێرخوازی دەزگای خێرخوازیی بارزانی مرۆڤە. هەر مرۆڤێک پیویستی بە هاوکاری هەبێت و لەتوانای ئێمەدا بێت کە هاوکاری بکەین هاوکاری پێشکەش دەکەین بەبێ لەبەرچاوگرتنی باکگراوندی نەتەوەیی و ئیتنی و ئاینی و سیاسی و کۆمەڵایەتی و کەسیی ئەو مرۆڤە.

بێلایەنی

دەزگای خێرخوازیی بارزانی وەکو دەزگایەکی مرۆیی بێلایەن مامەڵە لەگەڵ گروپە جیاوازەکان دەکات و نابێتە بەشێک لە هیچ کێشەیەکی سیاسی و ئیتنی و نەتەوەیی و کۆمەڵایەتی. دەزگای خێرخوازیی بارزانی بەگوێرەی توانای خۆی بەشداری دەکات لە هاوکاریکردنی ئەو کەس و گروپانەی کە بەهۆکاری سروشتی یان مرۆیی پیویستیان بە هاوکاری مرۆیی هەیە بۆ بەردەوامیدان بە ژیانێکی شایستە بە مرۆڤ.

بابەتی بوون

دەزگای خێرخوازی بارزانی لەسەر بنەمای هەڵسەنگاندنی بابەتی سیاسەتی مرۆیی خۆی دادەڕێژێت و هەر لەسەر ئەو بنەمایەش کارو چالاکیە مرۆییەکانی خۆی جێبەجێدەکات. لێرەوە، لەهەر شوێنێک پێویستی کاری مرۆیی و بەهاناوەچوون هەبێت بەلەبەرچاوگرتنی پێداویستیە لۆجیستی و مرۆییەکان، دەزگای خێرخوازیی بارزانی هەوڵ دەدات لەو شوێنە کاری مرۆیی و خێرخوازی خۆی ئەنجام بدات .

سەربەخۆیی

دەزگای خێرخوازی بارزانی وەکو دەزگایەکەی مرۆیی سەربەخۆ کار دەکات و هیچ وابەستەیییەکی سیاسی و کۆمەڵایەتی و ئابووری نییە. دەزگا خاوەنی ستراتیژی کاری خۆیەتی و لەسەر ئەو بنەمایە کارو پڕۆژەکانی خۆی ئەنجام دەدات